zamin pe munkashif hoga jo aasman mein hai

zamīñ pe munkashif hogā jo āsmān meñ hai

parinda merī du'ā kā abhī uḌaan meñ hai

butān-e-āzarī sajde meñ gir paḌeñge sabhī

ye zarb-e-lā-ilah jab tak tirī azaan meñ hai

talab kī ḳhvāhisheñ jis samt chāhe le jaa.eñ

ki hausla abhī baaqī mirī takān meñ hai

darīche sard havāoñ ke khol de koī

bahut ghuTan mire TuuTe hue makān meñ hai

zarūrī hai rag-e-bātil ko kāTne ke liye

bachā ke rakhnā abhī tiir jo kamān meñ hai

tirī du'ā ne badal diiñ jahāñ kī taqdīreñ

asar vo ab kahāñ momin tirī zabān meñ hai

ḳhamoshiyoñ se ulajhnā nahīñ mirā sheva

vahī kahūñgā jo ab tak mire gumān meñ hai

fazā jahāñ kī mukaddar hai jis taraf jaao

har ek shaḳhs kahāñ gosha-e-amān meñ hai

mirā zamīr ḳhatāoñ kā murtakib hai 'zafar'

ye baat roz-e-azal se kisī bayān meñ hai

zamin pe munkashif hoga jo aasman mein hai

parinda meri du'a ka abhi uDan mein hai

butan-e-azari sajde mein gir paDenge sabhi

ye zarb-e-la-ilah jab tak teri azan mein hai

talab ki KHwahishen jis samt chahe le jaen

ki hausla abhi baqi meri takan mein hai

dariche sard hawaon ke khol de koi

bahut ghuTan mere TuTe hue makan mein hai

zaruri hai rag-e-baatil ko kaTne ke liye

bacha ke rakhna abhi tir jo kaman mein hai

teri du'a ne badal din jahan ki taqdiren

asar wo ab kahan momin teri zaban mein hai

KHamoshiyon se ulajhna nahin mera shewa

wahi kahunga jo ab tak mere guman mein hai

faza jahan ki mukaddar hai jis taraf jao

har ek shaKHs kahan gosha-e-aman mein hai

mera zamir KHataon ka murtakib hai 'zafar'

ye baat roz-e-azal se kisi bayan mein hai