zamin pe saya na barg-o-samar hain shaKHon par

zamīñ pe saayā na barg-o-samar haiñ shāḳhoñ par

ajiib qahr barastā hai ab daraḳhtoñ par

hamāre dāman-o-dast-e-tahī ko kuchh na milā

milā unhī ko jo maa.il na the duāoñ par

na de shikasta diloñ ko naved-e-mustaqbil

yahī bahut hai ki ab tak chhupe haiñ va.adoñ par

duā.eñ dījiye insāf-e-dast-e-qātil ko

ki rone vaale bhī baaqī rahe na lāshoñ par

vafā nazar nahīñ aa.ī kisī kī āñkhoñ meñ

ajiib vaqt paḌā hai hamārī āñkhoñ par

darūn-e-ḳhāna ḳhudā jaane kyā udāsī hai

rukī huī haiñ nigāheñ hasīñ darīchoñ par

adā ho maut ke dast-e-karam hī se shāyad

vo qarz-e-zīst jo baaqī hai apnī sāñsoñ par

kahāñ dikhā.ī de aks-e-ḳhulūs ab 'rāhī'

jamī hai gard-e-adāvat diloñ ke shīshoñ par

zamin pe saya na barg-o-samar hain shaKHon par

ajib qahr barasta hai ab daraKHton par

hamare daman-o-dast-e-tahi ko kuchh na mila

mila unhi ko jo mail na the duaon par

na de shikasta dilon ko nawed-e-mustaqbil

yahi bahut hai ki ab tak chhupe hain wadon par

duaen dijiye insaf-e-dast-e-qatil ko

ki rone wale bhi baqi rahe na lashon par

wafa nazar nahin aai kisi ki aankhon mein

ajib waqt paDa hai hamari aankhon par

darun-e-KHana KHuda jaane kya udasi hai

ruki hui hain nigahen hasin darichon par

ada ho maut ke dast-e-karam hi se shayad

wo qarz-e-zist jo baqi hai apni sanson par

kahan dikhai de aks-e-KHulus ab 'rahi'

jami hai gard-e-adawat dilon ke shishon par