zamin se chal ke to pahuncha hun aasman tak main

zamīñ se chal ke to pahuñchā huuñ āsmāñ tak maiñ

safar kā bojh uThā.e phirūñ kahāñ tak maiñ

azal vajūd safar rāste kī dhuñd adam

qusūr-vār huuñ tartīb-e-dāstāñ tak maiñ

sukūn-e-zīst ibārat thā jis kī yādoñ se

bhulā chukā huuñ vo harf-e-qarār-e-jāñ tak maiñ

ye soch kar na koī rāste meñ luT jaa.e

diye jalātā chalā kū-e-dilbarāñ tak maiñ

maiñ zindagī kī ināyāt se nahīñ mahrūm

qarīb huuñ ġham-e-dil se ġham-e-jahāñ tak maiñ

na farsh merā Thikāna na arsh merā maqām

ye aur baat zamīñ par huuñ āsmāñ tak maiñ

zamin se chal ke to pahuncha hun aasman tak main

safar ka bojh uThae phirun kahan tak main

azal wajud safar raste ki dhund adam

qusur-war hun tartib-e-dastan tak main

sukun-e-zist ibarat tha jis ki yaadon se

bhula chuka hun wo harf-e-qarar-e-jaan tak main

ye soch kar na koi raste mein luT jae

diye jalata chala ku-e-dilbaran tak main

main zindagi ki inayat se nahin mahrum

qarib hun gham-e-dil se gham-e-jahan tak main

na farsh mera Thikana na arsh mera maqam

ye aur baat zamin par hun aasman tak main