zamin se kan laga aur aasman se sun

zamīñ se kaan lagā aur āsmān se sun

magar hai saḳht bahut marhala ye dhyān se sun

navāh-e-shahr meñ sun bheḌiyoñ kī āvāzeñ

lahū kī chīḳh har ik kū-e-be-amān se sun

har ek ḳhāna-e-ābād ghar hai vahshat kā

sadā.eñ gūñjte jangal kī har makān se sun

jo pahlī shart hai sunñe kī vo to puurī kar

yaqīñ nahīñ to kisī nek-o-bad-gumān se sun

jo saat pardoñ meñ rahtā thā rang-manch pe hai

suḳhan jo zer-e-labī thā vo ik jahān se sun

kathā qasāvat-e-qalbī ke barf hāthoñ kī

har ek moḌ pe jalte hue makān se sun

nazar ke aage ujaḌtī haiñ bastiyāñ kaise

ye dāstān bhī ik din mirī zabān se sun

nigāh-e-ġhair se māñgī huī samā.at se

kar apnī aañkh se nazzāra apne kaan se sun

fasād-e-shahr ke qisse sunā.eñge bāzār

kasād-e-dil kī kahānī har ik dukān se sun

hunar to jaan liye 'muztar' aib bhī apne

isī sukūn isī dhyān isī rasān se sun

zamin se kan laga aur aasman se sun

magar hai saKHt bahut marhala ye dhyan se sun

nawah-e-shahr mein sun bheDiyon ki aawazen

lahu ki chiKH har ek ku-e-be-aman se sun

har ek KHana-e-abaad ghar hai wahshat ka

sadaen gunjte jangal ki har makan se sun

jo pahli shart hai sunne ki wo to puri kar

yaqin nahin to kisi nek-o-bad-guman se sun

jo sat pardon mein rahta tha rang-manch pe hai

suKHan jo zer-e-labi tha wo ek jahan se sun

katha qasawat-e-qalbi ke barf hathon ki

har ek moD pe jalte hue makan se sun

nazar ke aage ujaDti hain bastiyan kaise

ye dastan bhi ek din meri zaban se sun

nigah-e-ghair se mangi hui samaat se

kar apni aankh se nazzara apne kan se sun

fasad-e-shahr ke qisse sunaenge bazar

kasad-e-dil ki kahani har ek dukan se sun

hunar to jaan liye 'muztar' aib bhi apne

isi sukun isi dhyan isi rasan se sun