zamin se ta-ba-falak koi fasla bhi nahin

zamīñ se tā-ba-falak koī fāsla bhī nahīñ

magar ufuq kī taraf koī dekhtā bhī nahīñ

sunā hai sabz ravā oḌh lī chaman ne magar

havā ke zor se barg-e-ḳhizāñ girā bhī nahīñ

bahut basīt hai dasht-e-jafā kī tanhā.ī

qarīb-o-dūr koī āhū-e-vafā bhī nahīñ

mujhe to ahd kā āshob kar gayā patthar

maiñ dard-mand kahāñ dard-āshnā bhī nahīñ

kabhī ḳhayāl ke rishtoñ ko bhī TaTol ke dekh

maiñ tujh se duur sahī tujh se kuchh judā bhī nahīñ

qadam qadam pe shikastoñ kā sāmnā hai magar

ye dil vo shīsha-e-jāñ hai ki TūTtā bhī nahīñ

mire vajūd meñ barpā hai us ḳhayāl se hashr

jo mere zehn meñ paidā abhī huā bhī nahīñ

maiñ jis ke sehr se koh-e-nidā tak aa pahuñchā

vo harf abhī mire lab se adā huā bhī nahīñ

maiñ ek gumbad-e-be-dar meñ qaid huuñ 'ārif'

mirī navā kā safar varna be-darā bhī nahīñ

zamin se ta-ba-falak koi fasla bhi nahin

magar ufuq ki taraf koi dekhta bhi nahin

suna hai sabz rawa oDh li chaman ne magar

hawa ke zor se barg-e-KHizan gira bhi nahin

bahut basit hai dasht-e-jafa ki tanhai

qarib-o-dur koi aahu-e-wafa bhi nahin

mujhe to ahd ka aashob kar gaya patthar

main dard-mand kahan dard-ashna bhi nahin

kabhi KHayal ke rishton ko bhi TaTol ke dekh

main tujh se dur sahi tujh se kuchh juda bhi nahin

qadam qadam pe shikaston ka samna hai magar

ye dil wo shisha-e-jaan hai ki TuTta bhi nahin

mere wajud mein barpa hai us KHayal se hashr

jo mere zehn mein paida abhi hua bhi nahin

main jis ke sehr se koh-e-nida tak aa pahuncha

wo harf abhi mere lab se ada hua bhi nahin

main ek gumbad-e-be-dar mein qaid hun 'arif'

meri nawa ka safar warna be-dara bhi nahin