zamin Thahar na saki aur na aasman Thahra

zamīñ Thahar na sakī aur na āsmāñ Thahrā

mirā hī zauq-e-junūñ merā pāsbāñ Thahrā

lagā.ī jis ke liye taḳht-o-tāj ko Thokar

usī kī bazm meñ maiñ misl-e-dāstāñ Thahrā

hamārā naqsh-e-qadam hai vahāñ vahāñ raushan

vafā kī raah meñ thak kar jahāñ jahāñ Thahrā

lipaT ke dāman-e-gul se kahā ye bulbul ne

nigāh-e-barq meñ merā hī āshiyāñ Thahrā

paḌhā sabhī ne use par samajh sakā na koī

kitāb-e-zīst kā har harf rā.egāñ Thahrā

junūn-e-ishq meñ kuchh bhī ḳhabar nahīñ mujh ko

na jaane kaun sī manzil pe kārvāñ Thahrā

maiñ jis ko ġhair samajhtā rahā sadā 'hassān'

har ek raaz kā mere vo rāzdāñ Thahrā

zamin Thahar na saki aur na aasman Thahra

mera hi zauq-e-junun mera pasban Thahra

lagai jis ke liye taKHt-o-taj ko Thokar

usi ki bazm mein main misl-e-dastan Thahra

hamara naqsh-e-qadam hai wahan wahan raushan

wafa ki rah mein thak kar jahan jahan Thahra

lipaT ke daman-e-gul se kaha ye bulbul ne

nigah-e-barq mein mera hi aashiyan Thahra

paDha sabhi ne use par samajh saka na koi

kitab-e-zist ka har harf raegan Thahra

junun-e-ishq mein kuchh bhi KHabar nahin mujh ko

na jaane kaun si manzil pe karwan Thahra

main jis ko ghair samajhta raha sada 'hassan'

har ek raaz ka mere wo raazdan Thahra