zamin thi hi nahin aasman tha hi nahin

zamīn thī hī nahīñ āsmān thā hī nahīñ

jahāñ pe ham the koī darmiyān thā hī nahīñ

suḳhan to varna diloñ ko bhī chiir detā hai

tire bayān meñ zor-e-bayān thā hī nahīñ

hasīn log uḌā le ga.e ḳhazāna-e-dil

ye ghar khulā thā koī pāsbān thā hī nahīñ

use bhī rog na.e mausamoñ kā lag gayā hai

havā ke ruḳh pe hamārā bhī dhyān thā hī nahīñ

ye kaun kashtī mirī sāhiloñ pe le aaya

havā thī tez bahut bādbān thā hī nahīñ

nasab kā jazb-e-tafāḳhur thā Dher miTTī kā

pata chalā ki mirā ḳhāndān thā hī nahīñ

zamin thi hi nahin aasman tha hi nahin

jahan pe hum the koi darmiyan tha hi nahin

suKHan to warna dilon ko bhi chir deta hai

tere bayan mein zor-e-bayan tha hi nahin

hasin log uDa le gae KHazana-e-dil

ye ghar khula tha koi pasban tha hi nahin

use bhi rog nae mausamon ka lag gaya hai

hawa ke ruKH pe hamara bhi dhyan tha hi nahin

ye kaun kashti meri sahilon pe le aaya

hawa thi tez bahut baadban tha hi nahin

nasab ka jazb-e-tafaKHur tha Dher miTTi ka

pata chala ki mera KHandan tha hi nahin