zamin TuT gai aasman TuT gaya

zamīn TuuT ga.ī āsmān TuuT gayā

lagā jo sang-e-haqīqat gumān TuuT gayā

abhī hayāt kā 'irfān hone vaalā thā

kisī ke paaoñ kī aahaT se dhyān TuuT gayā

nahīñ sañbhāl sake ham nishānī-e-tahzīb

chilamchī TuuT ga.ī pān-dān TuuT gayā

maiñ jab thā aa.ina mahfūz thā zamāne meñ

ajiib baat hai ban kar chaTān TuuT gayā

ḳhushī kī baat ki ḳhushbū bikhar ga.ī har-sū

alam kī baat nayā itr-dān TuuT gayā

ravāñ thī naav mirī jis ke dam se ai 'merāj'

usī havā se mirā bādbān TuuT gayā

zamin TuT gai aasman TuT gaya

laga jo sang-e-haqiqat guman TuT gaya

abhi hayat ka 'irfan hone wala tha

kisi ke paon ki aahaT se dhyan TuT gaya

nahin sanbhaal sake hum nishani-e-tahzib

chilamchi TuT gai pan-dan TuT gaya

main jab tha aaina mahfuz tha zamane mein

ajib baat hai ban kar chaTan TuT gaya

KHushi ki baat ki KHushbu bikhar gai har-su

alam ki baat naya itr-dan TuT gaya

rawan thi naw meri jis ke dam se ai 'meraj'

usi hawa se mera baadban TuT gaya