zamini rang mein Duba hua tha jal ka rang

zamīnī rang meñ Duubā huā thā jaal kā rang

samajh sake na parinde shikārī chaal kā rang

tumhāre chehre pe kyoñ aaj hai kamāl kā rang

kisī ke pyaar kā jaadū hai yā gulāl kā rang

kisī bhī ek hī rang meñ nazar nahīñ aate

alag alag huā kartā hai māh-o-sāl kā rang

khilā.īñ ḳhuun pasīne kī roTiyāñ ham ne

hamāre bachchoñ ke chehre pe hai halāl kā rang

jo sachche hote haiñ parhezgār hote haiñ

unhīñ kī aañkh meñ dekhā gayā jalāl kā rang

lagā ke paañv meñ mehñdī vo jab se utre haiñ

gulābī ho gayā us din se mere taal kā rang

tumhāre charche sune the bahut mohabbat ke

ye ḳhūnī ho gayā kaise tire ḳhayāl kā rang

kisī kī husn-e-nazar kā ye faiz hai mujh par

'hunar' ke chehre se raushan huā jamāl kā rang

zamini rang mein Duba hua tha jal ka rang

samajh sake na parinde shikari chaal ka rang

tumhaare chehre pe kyon aaj hai kamal ka rang

kisi ke pyar ka jadu hai ya gulal ka rang

kisi bhi ek hi rang mein nazar nahin aate

alag alag hua karta hai mah-o-sal ka rang

khilain KHun pasine ki roTiyan hum ne

hamare bachchon ke chehre pe hai halal ka rang

jo sachche hote hain parhezgar hote hain

unhin ki aankh mein dekha gaya jalal ka rang

laga ke panw mein mehndi wo jab se utre hain

gulabi ho gaya us din se mere tal ka rang

tumhaare charche sune the bahut mohabbat ke

ye KHuni ho gaya kaise tere KHayal ka rang

kisi ki husn-e-nazar ka ye faiz hai mujh par

'hunar' ke chehre se raushan hua jamal ka rang