zara bhi jaan ka KHatra uTha nahin sakte

zarā bhī jaan kā ḳhatra uThā nahīñ sakte

ye log tair ke us paar jā nahīñ sakte

alāmatoñ ke havāle se ḳhud ko pahchāno

ham in lakīroñ meñ chehra banā nahīñ sakte

qusūr-vār bhī Thahre agar to ham se ġhulām

amān-e-jāñ ke liye sar jhukā nahīñ sakte

ḳhushī meñ lipTī huī chand sā.atoñ ke evaz

tamām umr tirā ġham uThā nahīñ sakte

bahut aziiz haiñ maanā ki tere ġham lekin

ham is safar meñ tire saath aa nahīñ sakte

koī uThā.e bhī ham ko to kis taraf le jaa.e

ham apne ghar kā pata bhī batā nahīñ sakte

nazar bhī aa.e agar vo to zindagī meñ 'shakīl'

vo shor hai ki sadā bhī lagā nahīñ sakte

zara bhi jaan ka KHatra uTha nahin sakte

ye log tair ke us par ja nahin sakte

alamaton ke hawale se KHud ko pahchano

hum in lakiron mein chehra bana nahin sakte

qusur-war bhi Thahre agar to hum se ghulam

aman-e-jaan ke liye sar jhuka nahin sakte

KHushi mein lipTi hui chand saaton ke ewaz

tamam umr tera gham uTha nahin sakte

bahut aziz hain mana ki tere gham lekin

hum is safar mein tere sath aa nahin sakte

koi uThae bhi hum ko to kis taraf le jae

hum apne ghar ka pata bhi bata nahin sakte

nazar bhi aae agar wo to zindagi mein 'shakil'

wo shor hai ki sada bhi laga nahin sakte