zara bhi sohbat-e-bad ka asar nahin lagta

zarā bhī sohbat-e-bad kā asar nahīñ lagtā

jab us kī baat se pahle magar nahīñ lagtā

maiñ apne ashk kī vus.at ko jāntā huuñ mujhe

samundaroñ ke talātum se Dar nahīñ lagtā

tumhāre ishq meñ shorīdgī nahīñ aa.ī

ki tujh ko dasht-o-bayābān ghar nahīñ lagtā

dikhā rahe ho azīzoñ kī bazm meñ kyūñkar

jigar ke chaak ko Tāñkā idhar nahīñ lagtā

bichhaḌne vaale kā tā-umr ġham manāne de

hamārā dil kahīñ bār-e-digar nahīñ lagtā

jigar kā zaḳhm chhupā kar jahān se rakhiye

ye aa.ina kabhī dīvār par nahīñ lagtā

safar nasīb huā hai usī ke saath ki jo

kisī taraf se sharīk-e-safar nahīñ lagtā

zara bhi sohbat-e-bad ka asar nahin lagta

jab us ki baat se pahle magar nahin lagta

main apne ashk ki wusat ko jaanta hun mujhe

samundaron ke talatum se Dar nahin lagta

tumhaare ishq mein shoridgi nahin aai

ki tujh ko dasht-o-bayaban ghar nahin lagta

dikha rahe ho azizon ki bazm mein kyunkar

jigar ke chaak ko Tanka idhar nahin lagta

bichhaDne wale ka ta-umr gham manane de

hamara dil kahin bar-e-digar nahin lagta

jigar ka zaKHm chhupa kar jahan se rakhiye

ye aaina kabhi diwar par nahin lagta

safar nasib hua hai usi ke sath ki jo

kisi taraf se sharik-e-safar nahin lagta