zara kijiye ghaur hazrat-salamat

zarā kījiye ġhaur hazrat-salāmat

ye kyā sīkhā hai taur hazrat-salāmat

munāsib nahīñ ham ġharīboñ ke uupar

karo is qadar jaur hazrat-salāmat

tumheñ chhoḌ kar ab kaheñ dard kis se

hai koī dūsrā aur hazrat-salāmat

nahīñ jānte tum sivā ham kisī ko

hamāre ho sarmaur hazrat-salāmat

har ik daane meñ dil paḌe dekhtā huuñ

zahe pahuñche billor hazrat-salāmat

isī āstāne baġhair ham ko jag meñ

nahīñ hai kahīñ Thaur hazrat-salāmat

lagā.ī hai sandal kī tum ne jabīñ par

qayāmat hai ye ghor hazrat-salāmat

nahīñ bolte ham se so kyā sabab hai

ye kah diije fil-faur hazrat-salāmat

najīboñ se kyuuñ kar ḳhushī ho tumhārī

kamīnoñ kā hai daur hazrat-salāmat

bas ab kījiye muaaf dekheñ tamāshā

nikaltī hai gangor hazrat-salāmat

zara kijiye ghaur hazrat-salamat

ye kya sikha hai taur hazrat-salamat

munasib nahin hum gharibon ke upar

karo is qadar jaur hazrat-salamat

tumhein chhoD kar ab kahen dard kis se

hai koi dusra aur hazrat-salamat

nahin jaante tum siwa hum kisi ko

hamare ho sarmaur hazrat-salamat

har ek dane mein dil paDe dekhta hun

zahe pahunche billor hazrat-salamat

isi aastane baghair hum ko jag mein

nahin hai kahin Thaur hazrat-salamat

lagai hai sandal ki tum ne jabin par

qayamat hai ye ghor hazrat-salamat

nahin bolte hum se so kya sabab hai

ye kah dije fil-faur hazrat-salamat

najibon se kyun kar KHushi ho tumhaari

kaminon ka hai daur hazrat-salamat

bas ab kijiye muaf dekhen tamasha

nikalti hai gangor hazrat-salamat