zara sa shar tha agar KHair se nikal jata

zarā sā shar thā agar ḳhair se nikal jaatā

ta.alluqāt kā mafhūm hī badal jaatā

koī sunahrī kiran roz ham banā lete

ye barf hotā huā shahr kuchh pighal jaatā

kisī shajar pe mohabbat se haath rakh dete

to ghoñsloñ pe musallat azaab Tal jaatā

tane se Tek lagā.e manāte shām-e-vafā

to raat raat meñ saarā daraḳht phal jaatā

maiñ sabz bel ke mānind phailtī har sū

safed ūñche sutūnoñ pe merā bal jaatā

tire nafīs amāme ke pech yuuñ khulte

musāfiroñ ke liye sā.ebāñ meñ Dhal jaatā

kapās chuntī huī aurteñ sukhī hotīñ

jahāñ jahāñ ye zamīñ hai kisāñ kā hal jaatā

gharoñ meñ phailtī jaatī mohabbatoñ kī mahak

muġhā.irat kā dhuāñ ḳhud-ba-ḳhud nikal jaatā

ham ek dūsre kī baat rakh liyā karte

ye rakh-rakhāv sabhī fāsle nigal jaatā

zara sa shar tha agar KHair se nikal jata

talluqat ka mafhum hi badal jata

koi sunahri kiran roz hum bana lete

ye barf hota hua shahr kuchh pighal jata

kisi shajar pe mohabbat se hath rakh dete

to ghonslon pe musallat azab Tal jata

tane se Tek lagae manate sham-e-wafa

to raat raat mein sara daraKHt phal jata

main sabz bel ke manind phailti har su

safed unche sutunon pe mera bal jata

tere nafis amame ke pech yun khulte

musafiron ke liye saeban mein Dhal jata

kapas chunti hui aurten sukhi hotin

jahan jahan ye zamin hai kisan ka hal jata

gharon mein phailti jati mohabbaton ki mahak

mughairat ka dhuan KHud-ba-KHud nikal jata

hum ek dusre ki baat rakh liya karte

ye rakh-rakhaw sabhi fasle nigal jata