zara si baat ka dil ko malal aa hi gaya

zarā sī baat kā dil ko malāl aa hī gayā

lagī jo Thes to shīshe pe baal aa hī gayā

nahīñ jo vāqif-e-tahzīb-e-mai-kada vā'iz

zabāñ pe zikr-e-harām-o-halāl aa hī gayā

pakaḌ liyā mire hāthoñ ko ai ḳhudī tū ne

tirā ḳhayāl jo vaqt-e-savāl aa hī gayā

har ek lamha isī intizār meñ guzrā

ḳhudā kā shukr payām-e-visāl aa hī gayā

yaqīñ thā vā'da-e-fardā pe aap ke lekin

guzishta vā'doñ kā dil meñ ḳhayāl aa hī gayā

kuchh aisā vaqt bhī aaya mirī ḳhamoshī par

zabāñ se mauqa-e-iz.hār-e-hāl aa hī gayā

hazār chāhā thā maiñ ne 'azāb se bachnā

ta'alluqāt kā sar par vabāl aa hī gayā

ye māntā huuñ ki 'bahzād' kuchh nahīñ lekin

tumhārī bazm meñ ye ḳhasta-hāl aa hī gayā

zara si baat ka dil ko malal aa hi gaya

lagi jo Thes to shishe pe baal aa hi gaya

nahin jo waqif-e-tahzib-e-mai-kada wa'iz

zaban pe zikr-e-haram-o-halal aa hi gaya

pakaD liya mere hathon ko ai KHudi tu ne

tera KHayal jo waqt-e-sawal aa hi gaya

har ek lamha isi intizar mein guzra

KHuda ka shukr payam-e-visal aa hi gaya

yaqin tha wa'da-e-farda pe aap ke lekin

guzishta wa'don ka dil mein KHayal aa hi gaya

kuchh aisa waqt bhi aaya meri KHamoshi par

zaban se mauqa-e-izhaar-e-haal aa hi gaya

hazar chaha tha main ne 'azab se bachna

ta'alluqat ka sar par wabaal aa hi gaya

ye manta hun ki 'bahzad' kuchh nahin lekin

tumhaari bazm mein ye KHasta-haal aa hi gaya