zara si baat pe aankhen bhigone lagte the

zarā sī baat pe āñkheñ bhigone lagte the

hamāre jaise ḳhushī meñ bhī rone lagte the

udāsī ġhair kī āñkhoñ meñ jab bhī dikhtī thī

use bhī apnī hī āñkhoñ meñ Dhone lagte the

ajiib qurb thā tujh se ki vaqt-e-ruḳhsat meñ

udaas ghar ke sabhī log hone lagte the

hameñ pata hī nahīñ thī haqīqat-e-ta.abīr

saverā hote hī ham ḳhvāb bone lagte the

ġham-e-hayāt meñ vahshat kā aalam aisā thā

ki chīḳhte hue se ghar ke kone lagte the

bas apne jaise hī karte the ratjage varna

the aise log bhī jo ro ke sone lagte the

tirī nadī kī ravānī meñ thī kashish aisī

ham apnī kashtiyāñ ḳhud hī Dubone lagte the

zara si baat pe aankhen bhigone lagte the

hamare jaise KHushi mein bhi rone lagte the

udasi ghair ki aankhon mein jab bhi dikhti thi

use bhi apni hi aankhon mein Dhone lagte the

ajib qurb tha tujh se ki waqt-e-ruKHsat mein

udas ghar ke sabhi log hone lagte the

hamein pata hi nahin thi haqiqat-e-tabir

sawera hote hi hum KHwab bone lagte the

gham-e-hayat mein wahshat ka aalam aisa tha

ki chiKHte hue se ghar ke kone lagte the

bas apne jaise hi karte the ratjage warna

the aise log bhi jo ro ke sone lagte the

teri nadi ki rawani mein thi kashish aisi

hum apni kashtiyan KHud hi Dubone lagte the