zara si baat pe itna jalal kyun aaya

zarā sī baat pe itnā jalāl kyuuñ aayā

ta.alluqāt ke shīshe meñ baal kyuuñ aayā

kisī buzurg kī sohbat hai tum ko kyā ma.alūm

mire mizāj meñ ye e'tidāl kyuuñ aayā

zamīñ pe aa gayā maġhrūr ye ḳhabar bhī hai

taraqqiyāt ko us kī zavāl kyuuñ aayā

use gañvāne kā pachhtāvā gar nahīñ tujh ko

tirī zabān pe lafz-e-malāl kyuuñ aayā

chalo ye maanā shikārī nahīñ hai suufī hai

baġhal meñ apnī dabā kar vo jaal kyuuñ aayā

bichhaḌ ke bhī to tasavvur meñ tere ā.ūñgā

magar bichhaḌne kā tujh ko ḳhayāl kyuuñ aayā

jo ahl-e-hosh ko dīvāna hī banātā hai

nazar ke sāmne vo bā-kamāl kyuuñ aayā

gayā thā soch ke mil kar hī us se ā.ūñgā

'nazīr' lauT ke itnā niDhāl kyuuñ aayā

zara si baat pe itna jalal kyun aaya

talluqat ke shishe mein baal kyun aaya

kisi buzurg ki sohbat hai tum ko kya malum

mere mizaj mein ye e'tidal kyun aaya

zamin pe aa gaya maghrur ye KHabar bhi hai

taraqqiyat ko us ki zawal kyun aaya

use ganwane ka pachhtawa gar nahin tujh ko

teri zaban pe lafz-e-malal kyun aaya

chalo ye mana shikari nahin hai sufi hai

baghal mein apni daba kar wo jal kyun aaya

bichhaD ke bhi to tasawwur mein tere aaunga

magar bichhaDne ka tujh ko KHayal kyun aaya

jo ahl-e-hosh ko diwana hi banata hai

nazar ke samne wo ba-kamal kyun aaya

gaya tha soch ke mil kar hi us se aaunga

'nazir' lauT ke itna niDhaal kyun aaya