zara si der charaghon ka dil bahal jae

zarā sī der charāġhoñ kā dil bahal jaa.e

ye āftāb kahīñ aur jā ke jal jaa.e

ḳhudā parindoñ ke zyāda qarīb rahtā hai

ajab nahīñ ki shikārī kā tiir jal jaa.e

maiñ roz roz to chehre nahīñ badal saktā

kisī ko bhej mire aa.ine badal jaa.e

use girā ke hī aage agar nikalnā hai

ḳhudā kare ke mirā rāstā badal jaa.e

maiñ chāhtā huuñ tire dil meñ der se pahuñchūñ

maiñ chāhtā huuñ ki pahle mirī ġhazal jaa.e

maiñ is liye bhī tirā zikr roz kartā huuñ

kisī maqām pe shāyad ye dil sañbhal jaa.e

zara si der charaghon ka dil bahal jae

ye aaftab kahin aur ja ke jal jae

KHuda parindon ke zyaada qarib rahta hai

ajab nahin ki shikari ka tir jal jae

main roz roz to chehre nahin badal sakta

kisi ko bhej mere aaine badal jae

use gira ke hi aage agar nikalna hai

KHuda kare ke mera rasta badal jae

main chahta hun tere dil mein der se pahunchun

main chahta hun ki pahle meri ghazal jae

main is liye bhi tera zikr roz karta hun

kisi maqam pe shayad ye dil sanbhal jae