zara sochiyega ki kya kar chale

zarā sochiyegā ki kyā kar chale

mohabbat meñ tum ko ḳhudā kar chale

na apnā faqat ham bhalā kar chale

sabhī ḳhush raheñ ye du'ā kar chale

yaqīnan hai sachchā masīhā vahī

gale jo sabhī ko lagā kar chale

ġham-e-zindagī hai bahut qīmtī

zamāne se ham yuuñ chhupā kar chale

kabhī ā.eñge tum se milne zarūr

abhī to faqat ham pata kar chale

mohabbat meñ pāgal hue is qadar

raqīboñ se bhī ham vafā kar chale

kabhī lauT kar un ko aanā na thā

bahāna nayā ik banā kar chale

jo maqsad zamāne meñ laa.e the tum

vo kyā aap 'hashmat' adā kar chale

zara sochiyega ki kya kar chale

mohabbat mein tum ko KHuda kar chale

na apna faqat hum bhala kar chale

sabhi KHush rahen ye du'a kar chale

yaqinan hai sachcha masiha wahi

gale jo sabhi ko laga kar chale

gham-e-zindagi hai bahut qimti

zamane se hum yun chhupa kar chale

kabhi aaenge tum se milne zarur

abhi to faqat hum pata kar chale

mohabbat mein pagal hue is qadar

raqibon se bhi hum wafa kar chale

kabhi lauT kar un ko aana na tha

bahana naya ek bana kar chale

jo maqsad zamane mein lae the tum

wo kya aap 'hashmat' ada kar chale