zara zara si baat par wo mujhse bad-guman rahe

zarā zarā sī baat par vo mujh se bad-gumāñ rahe

jo raat din the mehrbāñ vo ab na mehrbāñ rahe

judā.iyoñ kī lazzatoñ kī vus.ateñ nahīñ rahīñ

vo ḳhush-ḳhayāl vasl ban ke mere darmiyāñ rahe

paheliyāñ bujhāo mat bahāne ab banāo mat

yahīñ kahīñ nahīñ the tum batāo phir kahāñ rahe

vo mere saath kab na the gila karūñ jo maiñ bhalā

zarā zarā sī baat kā fuzūl kyuuñ bayāñ rahe

na jhiil koī shahr meñ talayyā-tāl bhī nahīñ

ye lashkar-e-parind phir batā.iye kahāñ rahe

mohabbateñ muravvateñ lihāz yā ḳhulūs ho

sabhī haiñ dar-ba-dar ki ab na in ke qadr-dāñ rahe

masarratoñ kī dhuup un ke flat meñ hai raat din

hamāre ġham kī bastiyoñ meñ karb-e-jāvedāñ rahe

zarā zarā sī baat par bichhaḌ gayā jo be-sabab

anā va zid kī kashmakash meñ ham yahāñ vahāñ rahe

ye āsmāñ kī tīrgī numā.ishoñ kī raushnī

'kañval' tumhārī raah meñ hamesha kahkashāñ rahe

zara zara si baat par wo mujh se bad-guman rahe

jo raat din the mehrban wo ab na mehrban rahe

judaiyon ki lazzaton ki wusaten nahin rahin

wo KHush-KHayal wasl ban ke mere darmiyan rahe

paheliyan bujhao mat bahane ab banao mat

yahin kahin nahin the tum batao phir kahan rahe

wo mere sath kab na the gila karun jo main bhala

zara zara si baat ka fuzul kyun bayan rahe

na jhil koi shahr mein talayya-tal bhi nahin

ye lashkar-e-parind phir bataiye kahan rahe

mohabbaten murawwaten lihaz ya KHulus ho

sabhi hain dar-ba-dar ki ab na in ke qadr-dan rahe

masarraton ki dhup un ke flat mein hai raat din

hamare gham ki bastiyon mein karb-e-jawedan rahe

zara zara si baat par bichhaD gaya jo be-sabab

ana wa zid ki kashmakash mein hum yahan wahan rahe

ye aasman ki tirgi numaishon ki raushni

'kanwal' tumhaari rah mein hamesha kahkashan rahe