zard mausam ki aziyyat bhi uThane ka nahin

zard mausam kī aziyyat bhī uThāne kā nahīñ

maiñ daraḳhtoñ kī jagah ḳhud ko lagāne kā nahīñ

ab tire saath ta'alluq kī guzargāhoñ par

vaqt mushkil hai magar haath chhuḌāne kā nahīñ

qarya-e-sabz se aatī huī pur-kaif havā

taaq par rakkhā mirā diip bujhāne kā nahīñ

sabr kā ġhāza mire 'ishq kī zīnat Thahrā

so maiñ āñkhoñ se koī ashk bahāne kā nahīñ

chal rahā thā to sabhī log mire baazū the

gir paḌā huuñ to koī haath baḌhāne kā nahīñ

mujh ko ye mīr-taqī-'mīr' batāte haiñ 'sa'īd'

'ishq karnā hai magar jaan se jaane kā nahīñ

zard mausam ki aziyyat bhi uThane ka nahin

main daraKHton ki jagah KHud ko lagane ka nahin

ab tere sath ta'alluq ki guzargahon par

waqt mushkil hai magar hath chhuDane ka nahin

qarya-e-sabz se aati hui pur-kaif hawa

taq par rakkha mera dip bujhane ka nahin

sabr ka ghaza mere 'ishq ki zinat Thahra

so main aankhon se koi ashk bahane ka nahin

chal raha tha to sabhi log mere bazu the

gir paDa hun to koi hath baDhane ka nahin

mujh ko ye mir-taqi-'mir' batate hain 'sa'id'

'ishq karna hai magar jaan se jaane ka nahin