zard mausam mein nae phul khilane wale

zard mausam meñ na.e phuul khilāne vaale

mundamil kar na sake zaḳhm purāne vaale

kaun saudā-e-duā kartā hai zaḳhmoñ ke evaz

ham kahāñ aur kahāñ log zamāne vaale

fursat-e-ḳhvāb kahāñ aise hue haiñ bedār

tere jhoñke bhī nahīñ niiñd meñ laane vaale

chāshnī jā nahīñ saktī kabhī lafzoñ se tirī

chāhe mazmūn dar aa.eñ ka.ī aane vaale

dekhnā turra-e-shah sā vo ma.āl-o-hañgām

sar bhī dhar jā.eñge dastār bachāne vaale

fikr dāmāñ kī nahīñ karte nikal aate haiñ

ik hī silvaT pe ka.ī harf uThāne vaale

aaj garche nahīñ ik roz kareñge charchā

mere ahbāb nahīñ mujh ko bhulāne vaale

zard mausam mein nae phul khilane wale

mundamil kar na sake zaKHm purane wale

kaun sauda-e-dua karta hai zaKHmon ke ewaz

hum kahan aur kahan log zamane wale

fursat-e-KHwab kahan aise hue hain bedar

tere jhonke bhi nahin nind mein lane wale

chashni ja nahin sakti kabhi lafzon se teri

chahe mazmun dar aaen kai aane wale

dekhna turra-e-shah sa wo maal-o-hangam

sar bhi dhar jaenge dastar bachane wale

fikr daman ki nahin karte nikal aate hain

ek hi silwaT pe kai harf uThane wale

aaj garche nahin ek roz karenge charcha

mere ahbab nahin mujh ko bhulane wale