zarf us hasti-e-ma-fauq ka hona chaha

zarf us hastī-e-mā-fauq kā honā chāhā

maiñ ne qatre meñ samundar ko Dubonā chāhā

ġham o 'ishrat ko baham maiñ ne samonā chāhā

thaam kar dāman-e-mahbūb ko ronā chāhā

ġharq be-ishrat-e-paikār na honā chāhā

maiñ ne tūfān ko kashtī meñ Dubonā chāhā

dilkashī rāh-e-mohabbat kī ilāhī tauba

be-ḳhudī ne sar-e-manzil mujhe khonā chāhā

dāman-e-tar kī tarah ashk-e-nadāmat ne mire

hashr meñ nāma-e-a.amāl ko dhonā chāhā

'ishq ne husn kī aamad pe sajā manzar-e-chashm

har mizha meñ guhar-e-ashk pironā chāhā

ban ga.e ashk mire dost ke māthe kā araq

mahr ko rash.ha-e-shabnam ne bhigonā chāhā

ishq-e-gustāḳh kī allāh rī rāhat-talabī

rakh ke sar zānū-e-mahbūb pe sonā chāhā

dil ne ḳhud merī tabāhī kā uThāyā biiḌā

nā-ḳhudā ne mirī kashtī ko Dubonā chāhā

sa.i'-e-nākām ne kyā shaġhl nikālā āḳhir

āñsuoñ se ḳhat-e-taqdīr ko dhonā chāhā

zarf us hasti-e-ma-fauq ka hona chaha

main ne qatre mein samundar ko Dubona chaha

gham o 'ishrat ko baham main ne samona chaha

tham kar daman-e-mahbub ko rona chaha

gharq be-ishrat-e-paikar na hona chaha

main ne tufan ko kashti mein Dubona chaha

dilkashi rah-e-mohabbat ki ilahi tauba

be-KHudi ne sar-e-manzil mujhe khona chaha

daman-e-tar ki tarah ashk-e-nadamat ne mere

hashr mein nama-e-amal ko dhona chaha

'ishq ne husn ki aamad pe saja manzar-e-chashm

har mizha mein guhar-e-ashk pirona chaha

ban gae ashk mere dost ke mathe ka araq

mahr ko rashha-e-shabnam ne bhigona chaha

ishq-e-gustaKH ki allah ri rahat-talabi

rakh ke sar zanu-e-mahbub pe sona chaha

dil ne KHud meri tabahi ka uThaya biDa

na-KHuda ne meri kashti ko Dubona chaha

sai'-e-nakaam ne kya shaghl nikala aaKHir

aansuon se KHat-e-taqdir ko dhona chaha