zarra mila to dasht ka ham-sar laga mujhe

zarra milā to dasht kā ham-sar lagā mujhe

qatra milā to vo bhī samundar lagā mujhe

pāgal havā ne chehre ko zaḳhmī sā kar diyā

ā.īna dekhte hue kal Dar lagā mujhe

shāḳh-e-gulāb huuñ na maiñ zaitūn kī qalam

āñgan meñ apne soch samajh kar lagā mujhe

jhulsā diyā hai mujh ko havādis kī aag ne

ai chārasāz barf ke andar lagā mujhe

maqtal meñ jab kisī ke bhī kāñdhe pe sar na thā

jo sar-burīda shaḳhs thā ham-sar lagā mujhe

'sarshār' vo charāġh jo āñdhī kī zad pe thā

bujh kar bhī raushnī kā payambar lagā mujhe

zarra mila to dasht ka ham-sar laga mujhe

qatra mila to wo bhi samundar laga mujhe

pagal hawa ne chehre ko zaKHmi sa kar diya

aaina dekhte hue kal Dar laga mujhe

shaKH-e-gulab hun na main zaitun ki qalam

aangan mein apne soch samajh kar laga mujhe

jhulsa diya hai mujh ko hawadis ki aag ne

ai chaarasaz barf ke andar laga mujhe

maqtal mein jab kisi ke bhi kandhe pe sar na tha

jo sar-burida shaKHs tha ham-sar laga mujhe

'sarshaar' wo charagh jo aandhi ki zad pe tha

bujh kar bhi raushni ka payambar laga mujhe