zarre chamak uThe hain jidhar se guzar gae

zarre chamak uThe haiñ jidhar se guzar ga.e

duniyā Thahar ga.ī hai jahāñ tum Thahar ga.e

kal hī mile the aaj ye hone lagā ḳhayāl

dekhe hue kisī ko mahīne guzar ga.e

ai iztirāb-e-shauq burā ho tirā ki ham

jaate bhalā kisī kī galī meñ magar ga.e

terā bhalā ho terī mohabbat ke chaar din

duniyā kisī ġharīb kī barbād kar ga.e

ai raat kyā tujhe bhī kisī kā hai intizār

palkoñ se kyuuñ ye TuuT ke taare bikhar ga.e

ik baar paḌh ke naam tirā aaj daf.atan

dil par nuqūsh-e-ahd-e-mohabbat ubhar ga.e

majbūriyoñ ne baḌh ke vahīñ dil dabā diyā

nazreñ bachā ke paas se un ke guzar ga.e

sharmā ke ek baar zarā muskurā to do

dekho guloñ ke baaġh meñ chehre utar ga.e

kyā jaane kyā guzartī kabhī tum se chhūT kar

tum ne na kī nibāh ye ehsān kar ga.e

dil par kisī kī chashm-e-ināyat bhī baar thī

aise bhī din 'shahāb' kuchh apne guzar ga.e

zarre chamak uThe hain jidhar se guzar gae

duniya Thahar gai hai jahan tum Thahar gae

kal hi mile the aaj ye hone laga KHayal

dekhe hue kisi ko mahine guzar gae

ai iztirab-e-shauq bura ho tera ki hum

jate bhala kisi ki gali mein magar gae

tera bhala ho teri mohabbat ke chaar din

duniya kisi gharib ki barbaad kar gae

ai raat kya tujhe bhi kisi ka hai intizar

palkon se kyun ye TuT ke tare bikhar gae

ek bar paDh ke nam tera aaj dafatan

dil par nuqush-e-ahd-e-mohabbat ubhar gae

majburiyon ne baDh ke wahin dil daba diya

nazren bacha ke pas se un ke guzar gae

sharma ke ek bar zara muskura to do

dekho gulon ke bagh mein chehre utar gae

kya jaane kya guzarti kabhi tum se chhuT kar

tum ne na ki nibah ye ehsan kar gae

dil par kisi ki chashm-e-inayat bhi bar thi

aise bhi din 'shahab' kuchh apne guzar gae