zarre ka raaz mehr ko samjhana chahiye

zarre kā raaz mehr ko samjhānā chāhiye

chhoTī sī koī baat ho laḌ jaanā chāhiye

ḳhvāboñ kī ek naav samundar meñ Daal ke

tūfāñ kī mauj mauj se Takrānā chāhiye

har baat meñ jo zahr ke nashtar lagā.e haiñ

aise hī dil-jaloñ se to yārāna chāhiye

kyā zindagī se baḌh ke jahannam nahīñ koī

ye sach hai phir to aag meñ jal jaanā chāhiye

duniyā vo shāhrāh hai bachnā muhāl hai

pagDanDiyoñ ko DhūñD ke apnānā chāhiye

nazmeñ vo hoñ ki chīḳh paḌeñ saare ahl-e-fan

nīñdeñ uḌā de sab kī vo afsāna chāhiye

bahroñ ko toḌ toḌ ke naale meñ Daal do

bas dil kī lai meñ fikr ko Dhal jaanā chāhiye

ye kahkashāñ bhī TuuT ke ho misroñ meñ jazb

zehn-e-rasā ko itnā to uljhānā chāhiye

ham 'ulysses' ban ke bahut jī chuke magar

yaaro 'husain' ban ke bhī mar jaanā chāhiye

zarre ka raaz mehr ko samjhana chahiye

chhoTi si koi baat ho laD jaana chahiye

KHwabon ki ek naw samundar mein Dal ke

tufan ki mauj mauj se Takrana chahiye

har baat mein jo zahr ke nashtar lagae hain

aise hi dil-jalon se to yarana chahiye

kya zindagi se baDh ke jahannam nahin koi

ye sach hai phir to aag mein jal jaana chahiye

duniya wo shahrah hai bachna muhaal hai

pagDanDiyon ko DhunD ke apnana chahiye

nazmen wo hon ki chiKH paDen sare ahl-e-fan

ninden uDa de sab ki wo afsana chahiye

bahron ko toD toD ke nale mein Dal do

bas dil ki lai mein fikr ko Dhal jaana chahiye

ye kahkashan bhi TuT ke ho misron mein jazb

zehn-e-rasa ko itna to uljhana chahiye

hum 'ulysses' ban ke bahut ji chuke magar

yaro 'husain' ban ke bhi mar jaana chahiye