zaruraton ka tamasha nahin banaunga

zarūratoñ kā tamāsha nahīñ banā.ūñgā

maiñ apne haath ko kaasa nahīñ banā.ūñgā

maiñ nange pair phiruñgā jahān bhar meñ magar

kisī kī khaal se juutā nahīñ banā.ūñgā

riyāz karte hue thak na jaa.e ye bachcha

maiñ gintiyoñ se pahāḌā nahīñ banā.ūñgā

agar maiñ rāh-e-siyāsat meñ paañv rakkhūñgā

use kamāne kā dhandā nahīñ banā.ūñgā

mile na mujh ko bajā daam merī mehnat kā

maiñ saaḌī ke liye goTā nahīñ banā.ūñgā

ga.e haiñ jab se yahāñ jail meñ ka.ī baabā

maḌhī banā.ūñgā Derā nahīñ banā.ūñgā

phir is ke ba.ad na Dūbegī chāñdnī merī

maiñ bathtub kabhī gahrā nahīñ banā.ūñgā

nahīñ hai abr yahāñ e'tibār ke qābil

maiñ is makān ko kachchā nahīñ banā.ūñgā

karūñgā pyaar maiñ us ḳhush-jamāl paikar ko

par apnī āñkhoñ meñ ḳhāka nahīñ banā.ūñgā

tumhāre ġham ko piroyā karūñgā ġhazloñ meñ

maiñ apnī aañkh meñ dariyā nahīñ banā.ūñgā

zaruraton ka tamasha nahin banaunga

main apne hath ko kasa nahin banaunga

main nange pair phirunga jahan bhar mein magar

kisi ki khaal se juta nahin banaunga

riyaz karte hue thak na jae ye bachcha

main gintiyon se pahaDa nahin banaunga

agar main rah-e-siyasat mein panw rakkhunga

use kamane ka dhanda nahin banaunga

mile na mujh ko baja dam meri mehnat ka

main saDi ke liye goTa nahin banaunga

gae hain jab se yahan jail mein kai baba

maDhi banaunga Dera nahin banaunga

phir is ke baad na Dubegi chandni meri

main bathtub kabhi gahra nahin banaunga

nahin hai abr yahan e'tibar ke qabil

main is makan ko kachcha nahin banaunga

karunga pyar main us KHush-jamal paikar ko

par apni aankhon mein KHaka nahin banaunga

tumhaare gham ko piroya karunga ghazlon mein

main apni aankh mein dariya nahin banaunga