zau-bar isi samt hue shams-o-qamar bhi

zau-bār isī samt hue shams-o-qamar bhī

us shoḳh ne pherā ruḳh-e-pur-nūr jidhar bhī

miTtī hai kahīñ dil se shab-e-ġham kī siyāhī

hotī hai kahīñ hijr ke māroñ kī sahar bhī

haiñ donoñ jahāñ ek hī tanvīr ke partav

hai ek hī jalva jo idhar bhī hai udhar bhī

niklī thī tire jalva-e-rañgīñ kī ḳhabar ko

gum ho ke vahīñ rah ga.ī kambaḳht nazar bhī

hotī hī nahīñ sub.h nikhartā hī nahīñ nuur

hai Duubī huī shab kī siyāhī meñ sahar bhī

kuchh un kī hasīñ yaad kī sham.eñ thiiñ farozāñ

kuchh nūr-fishāñ dil meñ rahā dāġh-e-jigar bhī

samjheñ na 'jalīs' aap hameñ hech ki ham meñ

haiñ aib hazāroñ to hazāroñ haiñ hunar bhī

zau-bar isi samt hue shams-o-qamar bhi

us shoKH ne phera ruKH-e-pur-nur jidhar bhi

miTti hai kahin dil se shab-e-gham ki siyahi

hoti hai kahin hijr ke maron ki sahar bhi

hain donon jahan ek hi tanwir ke partaw

hai ek hi jalwa jo idhar bhi hai udhar bhi

nikli thi tere jalwa-e-rangin ki KHabar ko

gum ho ke wahin rah gai kambaKHt nazar bhi

hoti hi nahin subh nikharta hi nahin nur

hai Dubi hui shab ki siyahi mein sahar bhi

kuchh un ki hasin yaad ki shamen thin farozan

kuchh nur-fishan dil mein raha dagh-e-jigar bhi

samjhen na 'jalis' aap hamein hech ki hum mein

hain aib hazaron to hazaron hain hunar bhi