zauq-e-wafa-e-ishq na ruswa karenge hum

zauq-e-vafā-e-'ishq na rusvā kareñge ham

taḌpā.eñge huzūr to taḌpā kareñge ham

yuuñ rasm-e-bandagī meñ izāfa kareñge ham

un ko biThā ke sāmne sajda kareñge ham

hāsil-kalām 'ishq meñ aur kyā kareñge ham

banda-navāz aap ko sajda kareñge ham

kyā ġham hai kyā ḳhushī hai na pūchhā kareñge ham

har ruḳh se zindagī kā nazārā kareñge ham

do din kī ziist us pe alam kī ziyādtī

is kā zarūr aap se shikva kareñge ham

ā.īna aa chukā hai barābar subūt meñ

vaisā javāb pā.eñge jaisā kareñge ham

baḌhtā hai ġham-nasīboñ ke rone se aur dukh

ab ābloñ ko apne na chheḌā kareñge ham

dair-o-haram se shaad ki nāshād aa.e haiñ

is baat kā kisī se na charchā kareñge ham

'rāfat' firāq-e-dost ko badnām kyoñ kareñ

sau lutf intizār meñ paidā kareñge ham

zauq-e-wafa-e-'ishq na ruswa karenge hum

taDpaenge huzur to taDpa karenge hum

yun rasm-e-bandagi mein izafa karenge hum

un ko biTha ke samne sajda karenge hum

hasil-kalam 'ishq mein aur kya karenge hum

banda-nawaz aap ko sajda karenge hum

kya gham hai kya KHushi hai na puchha karenge hum

har ruKH se zindagi ka nazara karenge hum

do din ki zist us pe alam ki ziyaadti

is ka zarur aap se shikwa karenge hum

aaina aa chuka hai barabar subut mein

waisa jawab paenge jaisa karenge hum

baDhta hai gham-nasibon ke rone se aur dukh

ab aablon ko apne na chheDa karenge hum

dair-o-haram se shad ki nashad aae hain

is baat ka kisi se na charcha karenge hum

'rafat' firaq-e-dost ko badnam kyon karen

sau lutf intizar mein paida karenge hum