zawal-e-azmat-e-insan ka marsiya hun main

zavāl-e-azmat-e-insāñ kā marsiya huuñ maiñ

sar-e-kashīda pe dastār-e-be-anā huuñ maiñ

sag-e-zamāna se aage nikal gayā huuñ maiñ

ab apne sāmne tanhā khaḌā huā huuñ maiñ

mire vajūd meñ dar aayā kaisā sannāTā

ki reg-zār meñ gum-gashta ik sadā huuñ maiñ

Dubo na de kahīñ mujh ko bhī tishnagī kā safar

ki reg reg sarāboñ kā silsila huuñ maiñ

idhar se ho ke koī mehrbāñ havā guzre

dayār-e-habs meñ sadiyoñ se ghuT rahā huuñ maiñ

jise milī hai sazā harf-e-haq sunāne kī

salīb-e-lab pe vo Thahrī huī sadā huuñ maiñ

khaḌā huā huuñ harīfoñ meñ sar jhukā.e hue

ki apne aap se ab ke bahut judā huuñ maiñ

na koī aks-e-munavvar na manzar-e-ḳhush-rañg

ye kaise ḳhvāb ke bistar pe so rahā huuñ maiñ

ajiib āñdhī hai ye jism-o-jāñ kī āñdhī bhī

mujhe sambhāl bikharne se Dar rahā huuñ maiñ

kabhī na chhū sakī bāb-e-asar duā merī

ajiib qahr-e-musalsal meñ mubtalā huuñ maiñ

mujhe barasne kī taufīq de mire allāh

ki abr ban ke zamāne pe chhā gayā huuñ maiñ

na chhū sakī mujhe hirs-o-havas kī parchhā.īñ

ḳhudā kā shukr qanā.at se āshnā huuñ maiñ

rafūgarān-e-hunar 'nāz' be-namak the magar

phir apne zaḳhm ko shādāb dekhtā huuñ maiñ

zawal-e-azmat-e-insan ka marsiya hun main

sar-e-kashida pe dastar-e-be-ana hun main

sag-e-zamana se aage nikal gaya hun main

ab apne samne tanha khaDa hua hun main

mere wajud mein dar aaya kaisa sannaTa

ki reg-zar mein gum-gashta ek sada hun main

Dubo na de kahin mujh ko bhi tishnagi ka safar

ki reg reg sarabon ka silsila hun main

idhar se ho ke koi mehrban hawa guzre

dayar-e-habs mein sadiyon se ghuT raha hun main

jise mili hai saza harf-e-haq sunane ki

salib-e-lab pe wo Thahri hui sada hun main

khaDa hua hun harifon mein sar jhukae hue

ki apne aap se ab ke bahut juda hun main

na koi aks-e-munawwar na manzar-e-KHush-rang

ye kaise KHwab ke bistar pe so raha hun main

ajib aandhi hai ye jism-o-jaan ki aandhi bhi

mujhe sambhaal bikharne se Dar raha hun main

kabhi na chhu saki bab-e-asar dua meri

ajib qahr-e-musalsal mein mubtala hun main

mujhe barasne ki taufiq de mere allah

ki abr ban ke zamane pe chha gaya hun main

na chhu saki mujhe hirs-o-hawas ki parchhain

KHuda ka shukr qanaat se aashna hun main

rafugaran-e-hunar 'naz' be-namak the magar

phir apne zaKHm ko shadab dekhta hun main