zawal-e-gulsitan dekha na jae

zavāl-e-gulsitāñ dekhā na jaa.e

ujaḌtā āshiyāñ dekhā na jaa.e

uTho aur mausam-e-gul meñ badal do

agar daur-e-ḳhizāñ dekhā na jaa.e

rahā karte haiñ ham ab us zamīñ par

jahāñ se āsmāñ dekhā na jaa.e

ye ham bāda-kashoñ kī anjuman hai

yahāñ sūd-o-ziyāñ dekhā na jaa.e

kisī bulbul se kyoñ ab shāḳh-e-gul ko

chaman meñ gul-fishāñ dekhā na jaa.e

khaḌe haiñ sar ke bal shaiḳh-o-barahman

dar-e-pīr-e-muġhāñ dekhā na jaa.e

hamāre daur-e-ġhamgīñ meñ kisī se

kisī ko shādmāñ dekhā na jaa.e

na jaane kyoñ kisī mahfil meñ mujh se

kisī ko sargirāñ dekhā na jaa.e

bahut dekhī riyā-kārī-e-ādā

fareb-e-dostāñ dekhā na jaa.e

dayār-e-dair yā sehn-e-haram meñ

hujūm-e-mai-kashāñ dekhā na jaa.e

safar meñ kārvāñ se duur rah kar

ġhubār-e-kārvāñ dekhā na jaa.e

siyāsat ke tan-e-be-jāñ pe 'amjad'

hujūm-e-kargasāñ dekhā na jaa.e

zawal-e-gulsitan dekha na jae

ujaDta aashiyan dekha na jae

uTho aur mausam-e-gul mein badal do

agar daur-e-KHizan dekha na jae

raha karte hain hum ab us zamin par

jahan se aasman dekha na jae

ye hum baada-kashon ki anjuman hai

yahan sud-o-ziyan dekha na jae

kisi bulbul se kyon ab shaKH-e-gul ko

chaman mein gul-fishan dekha na jae

khaDe hain sar ke bal shaiKH-o-barahman

dar-e-pir-e-mughan dekha na jae

hamare daur-e-ghamgin mein kisi se

kisi ko shadman dekha na jae

na jaane kyon kisi mahfil mein mujh se

kisi ko sargiran dekha na jae

bahut dekhi riya-kari-e-ada

fareb-e-dostan dekha na jae

dayar-e-dair ya sehn-e-haram mein

hujum-e-mai-kashan dekha na jae

safar mein karwan se dur rah kar

ghubar-e-karwan dekha na jae

siyasat ke tan-e-be-jaan pe 'amjad'

hujum-e-kargasan dekha na jae