zehn aur dil mein ajab jang hui hai is bar

zehn aur dil meñ ajab jañg huī hai is baar

zindagī mom se phir sañg huī hai is baar

terī duniyā jise hairat se sabhī dekhte haiñ

dekh kar mujh ko bahut dañg huī hai is baar

mujh ko badlāo nazar aayā hai ḳhud meñ bhī bahut

har adā us kī bhī be-Dhañg huī hai is baar

maiñ jise ishq kī me.arāj samajh baiThā thā

vo tapasyā bhī mirī bhañg huī hai is baar

fikr ke sahn meñ ma.asūm ġhazal kī titlī

merā ḳhuuñ chuus ke ḳhush-rañg huī hai is baar

maiñ ġhazal ko koī āhañg nahīñ de paayā

to ġhazal ḳhud mirā āhañg huī hai is baar

āsmān-e-suḳhan-o-sher se jo utrī thī

vo zamīñ mujh pe bahut tañg huī hai is baar

zehn aur dil mein ajab jang hui hai is bar

zindagi mom se phir sang hui hai is bar

teri duniya jise hairat se sabhi dekhte hain

dekh kar mujh ko bahut dang hui hai is bar

mujh ko badlao nazar aaya hai KHud mein bhi bahut

har ada us ki bhi be-Dhang hui hai is bar

main jise ishq ki mearaj samajh baiTha tha

wo tapasya bhi meri bhang hui hai is bar

fikr ke sahn mein masum ghazal ki titli

mera KHun chus ke KHush-rang hui hai is bar

main ghazal ko koi aahang nahin de paya

to ghazal KHud mera aahang hui hai is bar

aasman-e-suKHan-o-sher se jo utri thi

wo zamin mujh pe bahut tang hui hai is bar