zehn jab be-asas hota hai

zehn jab be-asās hotā hai

shahr kā shahr udaas hotā hai

das sadī baa'd ye bhī dekh liyā

kaun yuuñ nā-sipās hotā hai

aa.ine par jilā na ho to kahāñ

nuur kā in.ikās hotā hai

dil meñ iblīs ho to dānish par

jahl kā iltibās hotā hai

us se hariyālī duur kar do to

sabza bas zard ghaas hotā hai

saare but nikleñ tab kaheñ ye dil

īshvar kā nivās hotā hai

ek hī dvāre jo navā.e siis

vo manush sachchā daas hotā hai

us kī mahimā kā or chhor nahīñ

daas ban kyoñ nirās hotā hai

ik navā-gar kā dard bāñTne ko

chāñd bhī ās-pās hotā hai

soch ke jism par katāñ se ḳhafī

chāñdnī kā libās hotā hai

zehn jab be-asas hota hai

shahr ka shahr udas hota hai

das sadi ba'd ye bhi dekh liya

kaun yun na-sipas hota hai

aaine par jila na ho to kahan

nur ka inikas hota hai

dil mein iblis ho to danish par

jahl ka iltibas hota hai

us se hariyali dur kar do to

sabza bas zard ghas hota hai

sare but niklen tab kahen ye dil

ishwar ka niwas hota hai

ek hi dware jo nawae sis

wo manush sachcha das hota hai

us ki mahima ka or chhor nahin

das ban kyon niras hota hai

ek nawa-gar ka dard banTne ko

chand bhi aas-pas hota hai

soch ke jism par katan se KHafi

chandni ka libas hota hai