zehn jab tere tasawwur mein rawan hota hai

zehn jab tere tasavvur meñ ravāñ hotā hai

tū bhī bole to samā.at pe girāñ hotā hai

rāz-e-pinhāñ to bahar-hāl ayaañ hotā hai

lab jahāñ hilte nahīñ ashk ravāñ hotā hai

apne hone kā jise vahm-o-gumāñ hotā hai

ḳhud se milne kā use vaqt kahāñ hotā hai

laakh koshish pe bhī niklā na samāne vaalā

dil bhī kambaḳht koī andhā kuaañ hotā hai

ek jumbish bhī jahāñ vaj.h-e-halākat Thahrī

koī dīvāna vahīñ raqs-kunāñ hotā hai

ishq ke saath na ġham ho to use kyā kahiye

aag ke saath bahar-hāl dhuāñ hotā hai

azm par 'umr-e-guzashta kī koī qaid nahīñ

jism būḌhā hī sahī azm javāñ hotā hai

tujh ko sochūñ to mirī fikr ġhazal hotī hai

aur jo dekhūñ to ehsās javāñ hotā hai

har amal kā to sila hai isī duniyā meñ 'fahīm'

aadmī ko magar ehsās kahāñ hotā hai

zehn jab tere tasawwur mein rawan hota hai

tu bhi bole to samaat pe giran hota hai

raaz-e-pinhan to bahar-haal ayan hota hai

lab jahan hilte nahin ashk rawan hota hai

apne hone ka jise wahm-o-guman hota hai

KHud se milne ka use waqt kahan hota hai

lakh koshish pe bhi nikla na samane wala

dil bhi kambaKHt koi andha kuan hota hai

ek jumbish bhi jahan wajh-e-halakat Thahri

koi diwana wahin raqs-kunan hota hai

ishq ke sath na gham ho to use kya kahiye

aag ke sath bahar-haal dhuan hota hai

azm par 'umr-e-guzashta ki koi qaid nahin

jism buDha hi sahi azm jawan hota hai

tujh ko sochun to meri fikr ghazal hoti hai

aur jo dekhun to ehsas jawan hota hai

har amal ka to sila hai isi duniya mein 'fahim'

aadmi ko magar ehsas kahan hota hai