zehn ke bagh mein khaDa hun main

zehn ke baaġh meñ khaḌā huuñ maiñ

zaḳhm ke phuul bāñTtā huuñ maiñ

gumbad-e-vaqt par chaḌhā huuñ maiñ

ḳhud ko āvāz de rahā huuñ maiñ

na.ī tahzīb kī ziyā huuñ maiñ

apne saa.e se Dar gayā huuñ maiñ

ziist ke khet se akelā hī

dard kī fasl kāTtā huuñ maiñ

yaad rakkhegā koī kyoñ mujh ko

ek jangal kā rāsta huuñ maiñ

mal ke vahshat kī raakh chehre par

shahr meñ apne ghūmtā huuñ maiñ

mujh ko apnā lo maiñ tumhārā huuñ

rāh-e-ulfat kā hādisa huuñ maiñ

zehn ke bagh mein khaDa hun main

zaKHm ke phul banTta hun main

gumbad-e-waqt par chaDha hun main

KHud ko aawaz de raha hun main

nai tahzib ki ziya hun main

apne sae se Dar gaya hun main

zist ke khet se akela hi

dard ki fasl kaTta hun main

yaad rakkhega koi kyon mujh ko

ek jangal ka rasta hun main

mal ke wahshat ki rakh chehre par

shahr mein apne ghumta hun main

mujh ko apna lo main tumhaara hun

rah-e-ulfat ka hadisa hun main