zehn ke charaghon ko muddaton jalaya hai

zehn ke charāġhoñ ko muddatoñ jalāyā hai

tab kahīñ hunar mujh meñ sochne kā aaya hai

aap ye samajhte haiñ yūñhī mil ga.ī mujh ko

is zamīn kī ḳhātir āsmāñ uThāyā hai

jis jagah samundar meñ kashtiyoñ ne dam toḌā

aañkh ne vahī manzar der tak dikhāyā hai

daaġh lagne kā ḳhatra jab bhī baḌh gayā maiñ ne

jism ko kināre rakh ruuh ko bachāyā hai

us ke baad āñkhoñ ne aur kuchh nahīñ dekhā

ek ḳhvāb ne mujh ko umr-bhar jagāyā hai

vaqt hī nahīñ detī sochne samajhne kā

zindagī ne ujlat meñ rāsta dikhāyā hai

manziloñ kī bāteñ bhī ek din kareñge ham

raah meñ abhī ham ne ik qadam baḌhāyā hai

zehn ke charaghon ko muddaton jalaya hai

tab kahin hunar mujh mein sochne ka aaya hai

aap ye samajhte hain yunhi mil gai mujh ko

is zamin ki KHatir aasman uThaya hai

jis jagah samundar mein kashtiyon ne dam toDa

aankh ne wahi manzar der tak dikhaya hai

dagh lagne ka KHatra jab bhi baDh gaya main ne

jism ko kinare rakh ruh ko bachaya hai

us ke baad aankhon ne aur kuchh nahin dekha

ek KHwab ne mujh ko umr-bhar jagaya hai

waqt hi nahin deti sochne samajhne ka

zindagi ne ujlat mein rasta dikhaya hai

manzilon ki baaten bhi ek din karenge hum

rah mein abhi hum ne ek qadam baDhaya hai