zehn ke jab ye dariche khule tab yaad aae

zehn ke jab ye darīche khule tab yaad aa.e

apnī barbādī ke phir ham ko sabab yaad aa.e

zindagī bujh ga.ī ik qatra mayassar na huā

tishna-kāmoñ ke lab-e-dariyā vo lab yaad aa.e

raat ḳhvābīda huī chāñd bhī rū-posh huā

ham use yaad bhī aa.e haiñ to kab yaad aa.e

kyā in hāthoñ meñ phir aa.egā nizām-e-ālam

aaj kyā baat hai shāhīn-e-arab yaad aa.e

kyoñ ḳhayālāt meñ ye baat kabhī aa.ī nahīñ

chhin gayā taḳht to phir nām-o-nasab yaad aa.e

ek ik lamha qayāmat se nahīñ kuchh kam thā

aaj kī raat vo yaad aa.e ġhazab yaad aa.e

phir ubhar aa.e mulāqāt ke vo saare nuqūsh

un kī dīvāroñ ke jab ham ko aqab yaad aa.e

āsmānoñ pe ghaTāoñ kā jo ik dekhā hujūm

'shād' maiḳhāne ke vo jām-e-tarab yaad aa.e

zehn ke jab ye dariche khule tab yaad aae

apni barbaadi ke phir hum ko sabab yaad aae

zindagi bujh gai ek qatra mayassar na hua

tishna-kaamon ke lab-e-dariya wo lab yaad aae

raat KHwabida hui chand bhi ru-posh hua

hum use yaad bhi aae hain to kab yaad aae

kya in hathon mein phir aaega nizam-e-alam

aaj kya baat hai shahin-e-arab yaad aae

kyon KHayalat mein ye baat kabhi aai nahin

chhin gaya taKHt to phir nam-o-nasab yaad aae

ek ek lamha qayamat se nahin kuchh kam tha

aaj ki raat wo yaad aae ghazab yaad aae

phir ubhar aae mulaqat ke wo sare nuqush

un ki diwaron ke jab hum ko aqab yaad aae

aasmanon pe ghaTaon ka jo ek dekha hujum

'shad' maiKHane ke wo jam-e-tarab yaad aae