zehn mein bite hue lamhon ka KHamyaza na tha

zehn meñ biite hue lamhoñ kā ḳhamyāza na thā

Dūbne se qabl gahrā.ī kā andāza na thā

chor ghus aa.e to nangī chaukhaToñ ke din phire

is se pahle mere ghar meñ koī darvāza na thā

lamha lamha zindagī ne ḳharch kar Daalā hameñ

vaqt jab aaya bikharne kā to shīrāza na thā

DhūñD kar marham bhī ham laa.e to aise vaqt meñ

zaḳhm saare bhar chuke the ek bhī taaza na thā

shukr kar mere junūñ kā varna ai ahd-e-ġhazal

ḳhūn-e-dil merā tire ruḳhsār kā ġhāza na thā

zehn mein bite hue lamhon ka KHamyaza na tha

Dubne se qabl gahrai ka andaza na tha

chor ghus aae to nangi chaukhaTon ke din phire

is se pahle mere ghar mein koi darwaza na tha

lamha lamha zindagi ne KHarch kar Dala hamein

waqt jab aaya bikharne ka to shiraaza na tha

DhunD kar marham bhi hum lae to aise waqt mein

zaKHm sare bhar chuke the ek bhi taza na tha

shukr kar mere junun ka warna ai ahd-e-ghazal

KHun-e-dil mera tere ruKHsar ka ghaza na tha