zehn mein ho koi manzil to nazar mein le jaun

zehn meñ ho koī manzil to nazar meñ le jā.ūñ

rāh-rau ke na agar gard safar meñ le jā.ūñ

dil se bach jaa.eñ agar dāġh-e-jigar meñ le jā.ūñ

kyuuñ charāġhoñ ko sar-e-shām sahar meñ le jā.ūñ

koī aahaT na koī aks na manzar na havā

kis ko mahsūs karūñ kis ko ḳhabar meñ le jā.ūñ

bām-o-dar par nazar aate haiñ thakan ke āsār

apnā ye bojh kisī dūsre ghar meñ le jā.ūñ

aur kuchh ḳhuun ho ḳhush-rañg to dil meñ rokūñ

aur kuchh ḳhaak ho pāmāl to sar meñ le jā.ūñ

jalte manzar se judā honā paḌegā kuchh ko

tishnagī tujh ko agar dīda-e-tar meñ le jā.ūñ

zehn mein ho koi manzil to nazar mein le jaun

rah-rau ke na agar gard safar mein le jaun

dil se bach jaen agar dagh-e-jigar mein le jaun

kyun charaghon ko sar-e-sham sahar mein le jaun

koi aahaT na koi aks na manzar na hawa

kis ko mahsus karun kis ko KHabar mein le jaun

baam-o-dar par nazar aate hain thakan ke aasar

apna ye bojh kisi dusre ghar mein le jaun

aur kuchh KHun ho KHush-rang to dil mein rokun

aur kuchh KHak ho pamal to sar mein le jaun

jalte manzar se juda hona paDega kuchh ko

tishnagi tujh ko agar dida-e-tar mein le jaun