zehn-o-dil par yun to ragDi hain barabar eDiyan

zehn-o-dil par yuuñ to ragḌī haiñ barābar eḌiyāñ

shā'irī kī kar na paa.e phir bhī ham tar eḌiyāñ

haq-bayānī is qalam se phir to mumkin hī nahīñ

haiñ hukūmat kī agar rakkhī qalam par eḌiyāñ

ab use bhī ḳhud-numā.ī kī zarūrat paḌ ga.ī

vo bhī ab chalne lagā apnī uThā kar eḌiyāñ

jin ke pairoñ ko yahāñ chappal kabhī miltī nahīñ

un se pūchho kaise ban jaatī haiñ patthar eḌiyāñ

koī kitnā bhī sañvāre ho nahīñ saktīñ kabhī

tum se achchhī tum se behtar tum se sundar eḌiyāñ

ek hī dar kā gadā huuñ merā mālik ek hai

maiñ na ragḌūñgā kabhī 'ilyās' dar-dar eḌiyāñ

zehn-o-dil par yun to ragDi hain barabar eDiyan

sha'iri ki kar na pae phir bhi hum tar eDiyan

haq-bayani is qalam se phir to mumkin hi nahin

hain hukumat ki agar rakkhi qalam par eDiyan

ab use bhi KHud-numai ki zarurat paD gai

wo bhi ab chalne laga apni uTha kar eDiyan

jin ke pairon ko yahan chappal kabhi milti nahin

un se puchho kaise ban jati hain patthar eDiyan

koi kitna bhi sanware ho nahin saktin kabhi

tum se achchhi tum se behtar tum se sundar eDiyan

ek hi dar ka gada hun mera malik ek hai

main na ragDunga kabhi 'ilyas' dar-dar eDiyan