zehn par musallat hai KHauf ki faza jaise

zehn par musallat hai ḳhauf kī fazā jaise

pesh aane vaalā hai koī hādsa jaise

vaqt biit jaatā hai chhoḌ kar nuqūsh apne

aa.ine se chehroñ par harf-e-be-sadā jaise

kitnā tez jhoñkā thā mushk-bū havāoñ kā

qāfila bahāroñ kā le uḌī sabā jaise

jab havā muḳhālif thī thā na ham-navā koī

ab havā muāfiq hai sab haiñ ham-navā jaise

raushnī kā hotā hai zehn meñ jhamāka sā

vo lab-e-tabassum hai barq-āshnā jaise

merī fikr bhī goyā ġhair kī amānat hai

mere fan pe haavī hai koī dūsrā jaise

aap se 'asar' sāhib lag rahā hai Dar ham ko

aap bhī to lagte haiñ ek pārsā jaise

zehn par musallat hai KHauf ki faza jaise

pesh aane wala hai koi hadsa jaise

waqt bit jata hai chhoD kar nuqush apne

aaine se chehron par harf-e-be-sada jaise

kitna tez jhonka tha mushk-bu hawaon ka

qafila bahaaron ka le uDi saba jaise

jab hawa muKHalif thi tha na ham-nawa koi

ab hawa muafiq hai sab hain ham-nawa jaise

raushni ka hota hai zehn mein jhamaka sa

wo lab-e-tabassum hai barq-ashna jaise

meri fikr bhi goya ghair ki amanat hai

mere fan pe hawi hai koi dusra jaise

aap se 'asar' sahib lag raha hai Dar hum ko

aap bhi to lagte hain ek parsa jaise