zer-e-zamin utar gae ya sar-e-asman gae

zer-e-zamīñ utar ga.e yā sar-e-āsmāñ ga.e

pesh-ravān-e-rāh-e-zīst kaun kahe kahāñ ga.e

koī rahā na aas paas ai dil-e-dost-nā-shanās

chhoḌ ke tujh ko mahv-e-yās sab tire mehrbāñ ga.e

arsa-e-ārzū meñ thiiñ yuuñ to hazār vus.ateñ

tere qarīb hī rahe ahl-e-vafā jahāñ ga.e

hosh ke marhaloñ meñ ik marhala-e-junūñ bhī thā

vādī-e-vahm se sabhī fikr ke kārvāñ ga.e

jab bhī havā-e-dasht ne ahl-e-junūñ ko dī sadā

mauj-e-shamīm-e-gul ke saath ham bhī kashāñ kashāñ ga.e

kaise vo log the jinheñ be-ḳhabarī qubūl thī

ham to junūn-e-āgahī le ke ga.e jahāñ ga.e

ahd-e-junūñ ke mashġhale vaqt ne sab badal diye

shauq kī laġhzisheñ ga.iiñ zabt ke imtihāñ ga.e

āḳhir-e-kār ḳhāmushī hī se khule diloñ ke raaz

harf-e-suḳhan zabāñ pe jo aa.e the rā.egāñ ga.e

hosh kī jur.ateñ tamām hadd-e-yaqīñ pe ruk ga.iiñ

ḳhalvat-e-nāz tak tirī sirf mire gumāñ ga.e

zehn kī chob-e-ḳhushk ko phūñk ga.ī suḳhan kī aañch

dūd-e-navā ke dā.ere jaane kahāñ kahāñ ga.e

zer-e-zamin utar gae ya sar-e-asman gae

pesh-rawan-e-rah-e-zist kaun kahe kahan gae

koi raha na aas pas ai dil-e-dost-na-shanas

chhoD ke tujh ko mahw-e-yas sab tere mehrban gae

arsa-e-arzu mein thin yun to hazar wusaten

tere qarib hi rahe ahl-e-wafa jahan gae

hosh ke marhalon mein ek marhala-e-junun bhi tha

wadi-e-wahm se sabhi fikr ke karwan gae

jab bhi hawa-e-dasht ne ahl-e-junun ko di sada

mauj-e-shamim-e-gul ke sath hum bhi kashan kashan gae

kaise wo log the jinhen be-KHabari qubul thi

hum to junun-e-agahi le ke gae jahan gae

ahd-e-junun ke mashghale waqt ne sab badal diye

shauq ki laghzishen gain zabt ke imtihan gae

aaKHir-e-kar KHamushi hi se khule dilon ke raaz

harf-e-suKHan zaban pe jo aae the raegan gae

hosh ki juraten tamam hadd-e-yaqin pe ruk gain

KHalwat-e-naz tak teri sirf mere guman gae

zehn ki chob-e-KHushk ko phunk gai suKHan ki aanch

dud-e-nawa ke daere jaane kahan kahan gae