zist aaghaz se itmam-e-safar hone tak

ziist āġhāz se itmām-e-safar hone tak

ik muamma hī rahī umr basar hone tak

ho na jaa.eñ kahīñ nairangī-e-dil se mahrūm

log shā.ista-e-tahzīb-e-nazar hone tak

jaane kitne ġham-o-ālām kā paikar hogī

zindagī lā.eq-e-takmīl-e-safar hone tak

ye bhī hai dam se hamāre hai vajūd-e-hastī

aur ham silsila-e-shām-o-sahar hone tak

jaane kyā chāhiye ab dair-o-haram se haT kar

sajda-e-ishq ko āsūda-e-dar hone tak

ye to ham jānte haiñ ham na raheñge ai dil

nazar-e-lutf-o-karam un kī idhar hone tak

sard-mehrī kā yahī haal agar hai saaqī

dekhiye kaun jiye vā tirā dar hone tak

rāz-e-sar-basta rahe yuuñ ki kisī par na khule

jazba-e-zauq-e-talab husn-e-nazar hone tak

un ke va.ade kā yaqīñ ho na ho lekin 'zamzam'

kyā ḳhabar ham na raheñ kal kī sahar hone tak

zist aaghaz se itmam-e-safar hone tak

ek muamma hi rahi umr basar hone tak

ho na jaen kahin nairangi-e-dil se mahrum

log shaista-e-tahzib-e-nazar hone tak

jaane kitne gham-o-alam ka paikar hogi

zindagi laeq-e-takmil-e-safar hone tak

ye bhi hai dam se hamare hai wajud-e-hasti

aur hum silsila-e-sham-o-sahar hone tak

jaane kya chahiye ab dair-o-haram se haT kar

sajda-e-ishq ko aasuda-e-dar hone tak

ye to hum jaante hain hum na rahenge ai dil

nazar-e-lutf-o-karam un ki idhar hone tak

sard-mehri ka yahi haal agar hai saqi

dekhiye kaun jiye wa tera dar hone tak

raaz-e-sar-basta rahe yun ki kisi par na khule

jazba-e-zauq-e-talab husn-e-nazar hone tak

un ke wade ka yaqin ho na ho lekin 'zamzam'

kya KHabar hum na rahen kal ki sahar hone tak