zist ke andhere mein raushni nahin aati

ziist ke añdhere meñ raushnī nahīñ aatī

yaad āj-kal mujh ko aap kī nahīñ aatī

maut se bahut pahle log marte dekhe haiñ

raas har kisī ko ye zindagī nahīñ aatī

aa.ina huuñ ulfat kā maiñ isī liye mujh ko

dostī to aatī hai dushmanī nahīñ aatī

aap jaise karte haiñ bhuul kar zamāne ko

us tarah mujhe karnī bandagī nahīñ aatī

jo bhī kaam karte haiñ dil lagā ke karte haiñ

aap kī qasam ham ko dil-lagī nahīñ aatī

jab talak shajar ko ham sīñchte nahīñ jaḌ tak

tab talak to us meñ bhī tāzgī nahīñ aatī

kar diyā hai zaḳhmoñ ne 'yāsmīñ' kā dil patthar

muskurāte hoñToñ par ab hañsī nahīñ aatī

zist ke andhere mein raushni nahin aati

yaad aaj-kal mujh ko aap ki nahin aati

maut se bahut pahle log marte dekhe hain

ras har kisi ko ye zindagi nahin aati

aaina hun ulfat ka main isi liye mujh ko

dosti to aati hai dushmani nahin aati

aap jaise karte hain bhul kar zamane ko

us tarah mujhe karni bandagi nahin aati

jo bhi kaam karte hain dil laga ke karte hain

aap ki qasam hum ko dil-lagi nahin aati

jab talak shajar ko hum sinchte nahin jaD tak

tab talak to us mein bhi tazgi nahin aati

kar diya hai zaKHmon ne 'yasmin' ka dil patthar

muskuraate honTon par ab hansi nahin aati