zist ki had hai jahan tak himmat-e-mardana hai

ziist kī had hai jahāñ tak himmat-e-mardāna hai

aadmī tārīḳh hai aur aadmī afsāna hai

ḳhum kahīñ bharpūr hai ḳhālī kahīñ paimāna hai

tū kahāñ soī huī ai jur.at-e-rindāna hai

saarī duniyā ik fareb-e-jalva-e-jānāna hai

ye haram hai duur se nazdīk se but-ḳhāna hai

vaqt kā merī tarah un ko bhī hai shikva magar

mere shikva kā zarā andāz bebākāna hai

ye kisī ne bhī na dekhā aag parvāne meñ thī

ye zamāna dekhtā hai aag meñ parvāna hai

kuchh havā de deñ agar bairūn-e-dar kī koshisheñ

ghar jalāne ke liye hāzir charāġh-e-ḳhāna hai

tishnagī-e-shauq manzil tak salāmat le ke jā

hoshiyār ai rāh-rau har moḌ par mai-ḳhāna hai

pursish-e-ahvāl par juz-shukr kuchh kahte nahīñ

boriye par bhī mizāj-e-ahl-e-dil shāhāna hai

zist ki had hai jahan tak himmat-e-mardana hai

aadmi tariKH hai aur aadmi afsana hai

KHum kahin bharpur hai KHali kahin paimana hai

tu kahan soi hui ai jurat-e-rindana hai

sari duniya ek fareb-e-jalwa-e-jaanana hai

ye haram hai dur se nazdik se but-KHana hai

waqt ka meri tarah un ko bhi hai shikwa magar

mere shikwa ka zara andaz bebakana hai

ye kisi ne bhi na dekha aag parwane mein thi

ye zamana dekhta hai aag mein parwana hai

kuchh hawa de den agar bairun-e-dar ki koshishen

ghar jalane ke liye hazir charagh-e-KHana hai

tishnagi-e-shauq manzil tak salamat le ke ja

hoshiyar ai rah-rau har moD par mai-KHana hai

pursish-e-ahwal par juz-shukr kuchh kahte nahin

boriye par bhi mizaj-e-ahl-e-dil shahana hai