zist ki zulfen pareshan hain to suljhaega kaun

ziist kī zulfeñ pareshāñ haiñ to suljhā.egā kaun

hashr kā maidāñ hai duniyā kis ke kaam aa.egā kaun

jaan bachtī hai kisī kī jhuuT se to Thiik hai

ik zarā sī baat par jhūTī qasam khā.egā kaun

rahnumāoñ ko bhī bhaTkā dete hoñ jo rāh-rau

is qadar bhaTke huoñ ko raah par lā.egā kaun

qahr jab nāzil huā uḌne lage zālim ke hosh

zo'm thā nadān ko us par sitam Dhā.egā kaun

kahte haiñ ki ḳhuld mil jā.egī taqve se magar

ye haqīqat talḳh-tar hai is ko apnā.egā kaun

jalva-e-jānānāñ to maujūd hai maḳhfī magar

hazrat-e-mūsā nahīñ haiñ tuur par jā.egā kaun

zist ki zulfen pareshan hain to suljhaega kaun

hashr ka maidan hai duniya kis ke kaam aaega kaun

jaan bachti hai kisi ki jhuT se to Thik hai

ek zara si baat par jhuTi qasam khaega kaun

rahnumaon ko bhi bhaTka dete hon jo rah-rau

is qadar bhaTke huon ko rah par laega kaun

qahr jab nazil hua uDne lage zalim ke hosh

zo'm tha nadan ko us par sitam Dhaega kaun

kahte hain ki KHuld mil jaegi taqwe se magar

ye haqiqat talKH-tar hai is ko apnaega kaun

jalwa-e-jaananan to maujud hai maKHfi magar

hazrat-e-musa nahin hain tur par jaega kaun