zist ko bad-rang kar de wo nahin sadma abhi

ziist ko bad-rang kar de vo nahīñ sadma abhī

tum ne dekhā hī nahīñ hai dard ko puurā abhī

sach bhī sharmā jā.egā sach dekh kar un kā abhī

sāmne se uTh gayā jo jhūTh kā pardā abhī

lauT aa.e haath ḳhālī koshishoñ ke bāvajūd

yaar matlab ye hai tum ne kuchh nahīñ Thānā abhī

haiñ judā ham tum magar ik rābta baaqī to hai

is liye donoñ kā ḳhālī-pan hai ik jaisā abhī

dekh lo ye vaqt kī ne'mat hai un kī asliyat

phir na kahnā chaḌh gayā jo chehre pe chehra abhī

yuuñ to jangal se nikal kar aa gayā hai aadmī

jānvar andar hai jo us ke nahīñ niklā abhī

zist ko bad-rang kar de wo nahin sadma abhi

tum ne dekha hi nahin hai dard ko pura abhi

sach bhi sharma jaega sach dekh kar un ka abhi

samne se uTh gaya jo jhuTh ka parda abhi

lauT aae hath KHali koshishon ke bawajud

yar matlab ye hai tum ne kuchh nahin Thana abhi

hain juda hum tum magar ek rabta baqi to hai

is liye donon ka KHali-pan hai ek jaisa abhi

dekh lo ye waqt ki ne'mat hai un ki asliyat

phir na kahna chaDh gaya jo chehre pe chehra abhi

yun to jangal se nikal kar aa gaya hai aadmi

jaanwar andar hai jo us ke nahin nikla abhi