zist ko chahiye bas tera sahaara jaanan

ziist ko chāhiye bas terā sahārā jānāñ

ye sahārā hī to hai ek hamārā jānāñ

banda-parvar mirī taqdīr sañvar jā.egī

ik tirī chashm-e-karam se hai guzārā jānāñ

ishq kā ranj-o-alam dil meñ liye baiThe haiñ

tujh se shikva to nahīñ koī hamārā jānāñ

bahr-e-isyāñ meñ huuñ Duubā huā maiñ sar-tā-pā

terī baḳhshish kā mile mujh ko kinārā jānāñ

ātish-e-hijr ne gulshan ko kiyā hai vīrān

bārish-e-vasl kī hājat hai dobārā jānāñ

bāzī-e-ishq meñ dil haar gayā hai 'usmān'

haar kar jiit kahāñ us ko gavārā jānāñ

zist ko chahiye bas tera sahaara jaanan

ye sahaara hi to hai ek hamara jaanan

banda-parwar meri taqdir sanwar jaegi

ek teri chashm-e-karam se hai guzara jaanan

ishq ka ranj-o-alam dil mein liye baiThe hain

tujh se shikwa to nahin koi hamara jaanan

bahr-e-isyan mein hun Duba hua main sar-ta-pa

teri baKHshish ka mile mujh ko kinara jaanan

aatish-e-hijr ne gulshan ko kiya hai viran

barish-e-wasl ki hajat hai dobara jaanan

bazi-e-ishq mein dil haar gaya hai 'usman'

haar kar jit kahan us ko gawara jaanan