zist ko qismat se kaam dekhiye kab tak rahe

ziist ko qismat se kaam dekhiye kab tak rahe

chhalkā huā dil kā jaam dekhiye kab tak rahe

kāñpte hoñToñ pe hai baat abhī uljhī huī

qissa-e-ġham nā-tamām dekhiye kab tak rahe

nabz bhī chaltī huī dil bhī dhaḌaktā huā

ārzū-e-sub.h-o-shām dekhiye kab tak rahe

jazb-e-vafā nā-tamām zauq-e-vafā be-sabāt

lab pe mohabbat kā naam dekhiye kab tak rahe

ab to hai badlī huī sāqiyā terī nazar

riñd ke hāthoñ meñ jaam dekhiye kab tak rahe

rāh-e-talab se mirī ḳhud to zamāna hai duur

mujh se zamāne ko kaam dekhiye kab tak rahe

saañs kī raftār se hasrateñ baḌhtī huī

qāfila ye tez-gām dekhiye kab tak rahe

terī tajallī to hai dair-o-haram se judā

hasrat-e-dil nā-tamām dekhiye kab tak rahe

arz-o-tamannā meñ hai rabt-o-asar bāhamī

'fazl' hameñ un se kaam dekhiye kab tak rahe

zist ko qismat se kaam dekhiye kab tak rahe

chhalka hua dil ka jam dekhiye kab tak rahe

kanpte honTon pe hai baat abhi uljhi hui

qissa-e-gham na-tamam dekhiye kab tak rahe

nabz bhi chalti hui dil bhi dhaDakta hua

aarzu-e-subh-o-sham dekhiye kab tak rahe

jazb-e-wafa na-tamam zauq-e-wafa be-sabaat

lab pe mohabbat ka nam dekhiye kab tak rahe

ab to hai badli hui saqiya teri nazar

rind ke hathon mein jam dekhiye kab tak rahe

rah-e-talab se meri KHud to zamana hai dur

mujh se zamane ko kaam dekhiye kab tak rahe

sans ki raftar se hasraten baDhti hui

qafila ye tez-gam dekhiye kab tak rahe

teri tajalli to hai dair-o-haram se juda

hasrat-e-dil na-tamam dekhiye kab tak rahe

arz-o-tamanna mein hai rabt-o-asar bahami

'fazl' hamein un se kaam dekhiye kab tak rahe