zist mein gham ka asar kal ki tarah aaj bhi hai

ziist meñ ġham kā asar kal kī tarah aaj bhī hai

is safīne meñ bhañvar kal kī tarah aaj bhī hai

hādse kar na sake merī mohabbat ko fanā

dard-e-dil dard-e-jigar kal kī tarah aaj bhī hai

ġhair mumkin hai sañvar jaa.e gulistāñ kā nizām

bāġhbāñ tang-nazar kal kī tarah aaj bhī hai

dair-o-ka.aba kī fazāoñ kā nahīñ mujh pe asar

terī dahlīz pe sar kal kī tarah aaj bhī hai

hai vahī rang vahī husn vahī ra.anā.ī

terā kūcha tirā dar kal kī tarah aaj bhī hai

ham ne maanā ki bahār aa.ī hai maiḳhāne meñ

pyaas rindoñ meñ magar kal kī tarah aaj bhī hai

ye alag baat hai hoñToñ pe hañsī hai 'nayyar'

zaḳhm siine meñ magar kal kī tarah aaj bhī hai

zist mein gham ka asar kal ki tarah aaj bhi hai

is safine mein bhanwar kal ki tarah aaj bhi hai

hadse kar na sake meri mohabbat ko fana

dard-e-dil dard-e-jigar kal ki tarah aaj bhi hai

ghair mumkin hai sanwar jae gulistan ka nizam

baghban tang-nazar kal ki tarah aaj bhi hai

dair-o-kaba ki fazaon ka nahin mujh pe asar

teri dahliz pe sar kal ki tarah aaj bhi hai

hai wahi rang wahi husn wahi ranai

tera kucha tera dar kal ki tarah aaj bhi hai

hum ne mana ki bahaar aai hai maiKHane mein

pyas rindon mein magar kal ki tarah aaj bhi hai

ye alag baat hai honTon pe hansi hai 'nayyar'

zaKHm sine mein magar kal ki tarah aaj bhi hai