zist mein rang bhar gai aaKHir

ziist meñ rañg bhar ga.ī āḳhir

vo nazar kaam kar ga.ī āḳhir

jazb-e-vahshat kī kārsāzī se

dil kī qismat sañvar ga.ī āḳhir

chiir kar parda-e-mah-o-anjum

aap hī par nazar ga.ī āḳhir

jo qayāmat guzarnī thī ham par

dil ke hāthoñ guzar ga.ī āḳhir

haa.e vo ik nigāh-e-duzdīda

kyā kyā ilzām dhar ga.ī āḳhir

jo ḳhalish dil meñ thī nihāñ pahle

rag-o-pai meñ utar ga.ī āḳhir

azm-e-tābāñ se bar-sar-e-manzil

raushnī sī bikhar ga.ī āḳhir

soz-e-dil ke tufail ai 'manshā'

shā.irī bhī nikhar ga.ī āḳhir

zist mein rang bhar gai aaKHir

wo nazar kaam kar gai aaKHir

jazb-e-wahshat ki karsazi se

dil ki qismat sanwar gai aaKHir

chir kar parda-e-mah-o-anjum

aap hi par nazar gai aaKHir

jo qayamat guzarni thi hum par

dil ke hathon guzar gai aaKHir

hae wo ek nigah-e-duzdida

kya kya ilzam dhar gai aaKHir

jo KHalish dil mein thi nihan pahle

rag-o-pai mein utar gai aaKHir

azm-e-taban se bar-sar-e-manzil

raushni si bikhar gai aaKHir

soz-e-dil ke tufail ai 'mansha'

shairi bhi nikhar gai aaKHir